Saturday, 24 January 2015

ചര്‍മസൗന്ദര്യത്തിന് കസ്തൂരിമഞ്ഞള്‍


ചര്‍മത്തിന് നിറവും സൗന്ദര്യവും നല്‍കുന്ന സുഗന്ധമുള്ള ഒരു വിഷഹരസസ്യമാണ് മഞ്ഞക്കൂവ എന്ന പേരില്‍ അറിയപ്പെടുന്ന കസ്തൂരി മഞ്ഞള്‍. സോപ്പ് നിര്‍മാതാക്കള്‍ അവരുടെ ഉത്പന്നം വിപണിയില്‍ വിറ്റഴിക്കുന്നതിന് കസ്തൂരി മഞ്ഞളിനെ പരസ്യത്തിന് ഉപയോഗിച്ചതോടെ യുവതികളുടെ സൗന്ദര്യവര്‍ധക പട്ടികയിലെ പ്രിയങ്കരമായ ഒരിനമായി ഇപ്പോള്‍ കസ്തൂരി മഞ്ഞള്‍.

സൗന്ദര്യവത്കരണത്തിനുള്ള അഭിരുചി മനുഷ്യസഹജമാണ്. സൂര്യരശ്മികള്‍, മാനസിക പിരിമുറുക്കം ഇതൊക്കെ ചര്‍മത്തെ പ്രതികൂലമായി ബാധിക്കുന്നു. ചര്‍മസംരക്ഷണത്തിന് പ്രകൃതിദത്തമായ ഔഷധങ്ങളുടെ ഉപയോഗം പാര്‍ശ്വഫലങ്ങള്‍ ഉണ്ടാക്കുന്നില്ല. പ്രസവിച്ച സ്ത്രീകള്‍ കുളിക്കുമ്പോള്‍ കസ്തൂരി മഞ്ഞള്‍ അരച്ച് ശരീരത്തില്‍ പുരട്ടി നാല്പാമര വെള്ളത്തില്‍ കുളിച്ചാല്‍ ചര്‍മത്തിനു നിറവും തിളക്കവും ലഭിക്കും.

നവജാത ശിശുക്കളെ കസ്തൂരി മഞ്ഞള്‍ തേച്ച് കുളിപ്പിച്ചാല്‍ രോഗാണുക്കളില്‍ നിന്ന് ചര്‍മം സംരക്ഷിച്ച് ചര്‍മത്തിന് നിറവും മാര്‍ദവും ലഭിക്കും. കസ്തൂരി മഞ്ഞള്‍ പനിനീരില്‍ അരച്ച് വെയിലത്തുവച്ച് ചൂടാക്കി പതിവായി മുഖത്തുപുരട്ടിയാല്‍ മുഖക്കുരു ഇല്ലാതാകും. (കണ്ണില്‍ ഒഴിക്കുന്ന കറുക പനിനീര്‍ ഉപയോഗിക്കണം. ആസിഡുകള്‍ ചേര്‍ന്ന കുപ്പികളില്‍ ലഭിക്കുന്ന പനിനീര്‍ ഉപയോഗിക്കരുത്). തുളസിയില ഉണക്കിപ്പൊടിച്ചതിന്റെ കൂടെ കസ്തൂരി മഞ്ഞളും കാര്‍കോലരിയും പൊടിച്ച് ചേര്‍ത്ത് പതിവായി ശരീരത്തില്‍ പുരട്ടിക്കുളിച്ചാല്‍ ശരീരത്തിലെ ചൊറിച്ചിലും (അലര്‍ജി) ശരീരത്തിലെ പാടുകളും ഇല്ലാതാകും. ചര്‍മത്തിന് നല്ലനിറം ലഭിക്കുകയും ചെയ്യും. കസ്തൂരിമഞ്ഞള്‍ തുളസിയില നീരില്‍ അരച്ച് വിഷജന്തുക്കള്‍ കടിച്ച കടിപ്പാടില്‍ പുരട്ടുന്നത് വിഷത്തെ നിര്‍വീര്യമാക്കാനും വിഷം വ്യാപിക്കുന്നതു തടയാനും സഹായിക്കും. ചെറുപയറിന്റെ പൊടിയോടൊപ്പം കസ്തൂരി മഞ്ഞള്‍ പൊടിച്ചുചേര്‍ത്ത് സോപ്പിനു പകരമായി ദിവസേന ഉപയോഗിക്കാം.

* കുടുംബം: സിന്‍ജിബറേസി
* ശാസ്ത്രനാമം: കുര്‍ക്കുമ അരോമാറ്റിക്ക സാലിസ്ബ്
* സംസ്‌കൃതം: കര്‍പ്പൂര, ഹരിദ്ര.

തയാറാക്കിയത്: എം.എം. ഗാഥ, വെള്ളിയൂര്‍.
News Courtesy:  http://www.deepika.com/feature/SpecialNews.aspx?ID=2663&topicId=3#sthash.cfDdzFWu.dpuf

No comments:

Post a Comment