Wednesday, 21 January 2015

വിളകള്‍ക്ക് ആരോഗ്യം പകരാന്‍ പ്ലാന്റ് ഹെല്‍ത്ത് ക്ലിനിക്ക്

കണ്ണൂര്‍: കൃഷിയിടത്തിലെ കീടങ്ങളുടെയും ഫംഗസുകളുടെയും പ്രശ്‌നങ്ങള്‍ക്കു പരിഹാരമായി രണ്ടാമത്തെ പ്ലാന്റ് ഹെല്‍ത്ത് ക്ലിനിക്കും തയാറായി. കൃഷിവകുപ്പിന്റെ ക്രോപ്പ്‌ഹെല്‍ത്ത് മാനേജ്‌മെന്റ് സ്‌കീം പ്രകാരം ജില്ലയില്‍ അനുവദിച്ച രണ്ടാമത്തെ പ്ലാന്റ് ഹെല്‍ത്ത് ക്ലിനിക്കും പ്രവര്‍ത്തനം തുടങ്ങികഴിഞ്ഞു. പേരാവൂര്‍ ബ്ലോക്കിന്റെ കീഴിലുള്ള മാലൂര്‍ കൃഷിഭവനിലാണു രണ്ടാമത്തെ ക്ലിനിക്ക് പ്രവര്‍ത്തനമാരംഭിച്ചത്. കാര്‍ഷിക വിളകള്‍ക്കുണ്ടാകുന്ന കീടരോഗങ്ങള്‍ക്ക് ഉടന്‍ പരിഹാരം നിര്‍ദേശിക്കുകയാണു ക്ലിനിക്കിലൂടെ ചെയ്യുന്നത്.

കര്‍ഷകര്‍ക്ക് അവരുടെ കൃഷിയിടത്തിലുണ്ടാകുന്ന കീടങ്ങളെ മനസിലാക്കുവാനായി നിരവധി കീടങ്ങളെ ശേഖരിച്ച് ക്ലിനിക്കില്‍ പ്രദര്‍ശിപ്പിച്ചിട്ടുണ്ട്. ഇതിലൂടെ കര്‍ഷകര്‍ക്ക് അവരുടെ കൃഷിയിടത്തിലുണ്ടാവുന്ന കീടാണുക്കള്‍ ഏതാണെന്നു മനസിലാക്കി പ്രതിവിധി ചെയ്യാന്‍ സാധിക്കുന്നു. കൂടാതെ മണ്ണ് സംരക്ഷിക്കുവാനാവശ്യമായ മാര്‍ഗനിര്‍ദേശങ്ങളും നല്‍കുന്നു. ഒരു കൃഷിയിടത്തില്‍ പാലിക്കേണ്ട എല്ലാ കാര്യങ്ങളും ക്ലിനിക്കിലൂടെ കര്‍ഷകര്‍ക്കു ലഭ്യമാകും.

ക്ലിനിക്കിന്റെ പ്രവര്‍ത്തനങ്ങള്‍ക്കായി അഞ്ചുലക്ഷം രൂപയാണ് അനുവദിച്ചത്. ലാബ്, മൈക്രോസ്‌കോപ്പ്, കര്‍ഷകര്‍ക്കു ലൈബ്രറി, അത്യാധുനിക കൃഷിരീതിയെക്കുറിച്ച് കര്‍ഷകരെ ബോധവാന്‍മാരാക്കാനുള്ള സൗകര്യം എന്നീ സേവനങ്ങളും ലഭ്യമാകും. പേരാവൂര്‍ ബ്ലോക്കിനു കീഴിലെ പഞ്ചായത്തുകള്‍ക്കും പ്ലാന്റ് ഹെല്‍ത്ത് ക്ലിനിക്കിന്റെ സേവനം ലഭ്യമാകും. 24 മണിക്കൂറും കര്‍ഷകര്‍ക്കു സേവനം ലഭ്യമാക്കുകയാണു ലക്ഷ്യം. ഇതിനായി നിയമിച്ച കൃഷി അസിസ്റ്റന്റിന്റെ സേവനവും കര്‍ഷകര്‍ക്കു പ്രയോജനപ്പെടുത്താം.

http://www.deepika.com/localnews/Localdetailnews.aspx?id=23788&Distid=KL13

No comments:

Post a Comment